Hinumduman

Diri ko gud nakakalimtan
An imo nawong syahan nakit-an.
Abi ko anghel kinanhi ha tuna
Para maghatag hin paghigugma.

Diri ko gud nakakalimtan
Imo boses syahan nabatian.
Bagan huni hin tamsi ha igbaw
Ha dughan nahatag hin kamurayaw.

Diri ko gud nakakalimtan
An imo ngisi nga akon nasay'ran.
Naghatag hin lamrag ug paglaum
Han akon kinabuhi nga masirum.

Diri ko gud nakakalimtan,
Paghigugma inabat na'k dughan.
Tungod han imo dara nga kalipay,
Kinabuhi ko naging maupay.

Diri ko gud nakakalimtan,
Tanan nga hatag mo nga kaupayan.
Salit yana ako ha imo gin mingaw,
Bumalik ka pangamoyo ko ha igbaw.

Diri ko gud nakakalimtan,
Han adlaw ako imo ginbayaan.
Tanan nga kaupayan nga gin-agian
Yana usa nala nga hinumduman.